شيماء محمود اسمي شيماء محمود من طرة مدينة الوحدة , الي كان اسمها زمان زرايب طرة , ناسها طيبين علي قد حالهم كلهم تقريبا بيشتغلوا في الزبالة , ابويا جه من الزاوية الحمرا واستقر هنا واشتغل برده في مهنة الزبالة من حوالى 40 سنه , انا مولودة في طرة فتحت عيني عليها كانت عبارة عن زرايب , يعني اماكن لفرز الزبالة وتربية الحيوانات وبيوت مبنية من الصفيح , لا في مكان نتعلم فيه ولا مكان نتعالج فيه ولا حتى مكان نمشى فيه , مكانش فيه غير حضانة من الصاج (حر نار في الصيف وثلج رصاص في الشتاء ) كانت بتيجي طاسوني تاخدنا من البيت وتلمناواحد واحد ونروح نتعلم ونلعب مع بعض فى الحضانة , وان كنت بحب ده قوي ببقي فرحانة وانا رايحة وجاية من الحضانة , ودخلت المدرسة فى جبل المقطم وكانت بعيدة عننا خدت اول وثانية وتالته ابتدائي , لكن للاسف لظروف المعيشة والدروس والمصاريف وابويا كبر مبقاش زي زمان , فكنت انا واتنين اخواتي اكبر مني في المدرسة وليا اخ معاق ذهنيا محتاج رعايا ومصاريف وعلاج , وابويا كان هيكفي ايه ولا ايه , فاشتغلت في الزباله علشان اقدر اساعد , لكن مانكرش ان الجيل بتاعي يمكن من المحظوظين لان جمعية حماية البيئة كانت دخلت المنطقة وده فى سنه 1996 , فكنت من وقت للتاني باجي المركز الطبي التابع للجمعية اسمع ندوات توعية للبنات عن الصحة وعن البيئة وعن النظافة وازاي اتعامل مع الناس, وكانت موفرة فصول محو امية وبدات انتظم فيها , نحمد ربنا ونشكر فضله قدرت اخدت شهادة محو الامية , واشتغلت في المشغل بتاع الجمعية كنت باعمل دواسات وشنط , و كنت مبسوطة احسن من شغل الزبالة , خصوصا لما عرفت ان شغلنا كان بيتصدر بره مصر , وبعدها لقيت الجمعية فاتحة تدريب للرائدات الصحية ,وبعتونى تدريبات علي التمريض في القصر العيني اتعلمت الاسعفات الاولية والتعامل مع المريض وكيفية تقديم الرعاية الصحية الاولية , وكان تدريب حلو اوووى ماقدرش انساه كمان لان دي كانت اول مرة رجلي تخطي بره المنطقة , وده كسر حاجز كبير جوايا اني اتعامل مع ناس بره المنطقة الي كنت فاكرة ان حدودهاا هي حدود العالم , خصوصا ان الناس في القصر العيني كانوا بيتكلموا كويس عن شغلي واني كنت بتعلم بسرعة , ساعتها صممت ان اكمل تعليمي واخد شهادة , هوانا اقل من الناس دي في ايه ؟ , في الجمعية شجعوني ووقفوا جنبي , مكنش عندنا مكان في البيت كنت باخد الدروس في الجمعية وكنت باخد اجازات ايام الامتحانات لو مش فاهمة حاجة بسال الدكاترة اللى فى المركز الطبى وزمايلي في الشغل , الحمد لله اخدت الاعدادية , وبعد كده الدبلوم , كل ده ساعدني في اني اتعامل مع اولادي ازاي , اذاكرلهم ازاي , اعلمهم ايه الصح وايه الغلط , نفسي يتعلموا كويس وميشفوش الي انا شفته , ازاي لو عيل تعب, او مرض ازاي ازاى اقدر اتصرف واخد بالي منه, وولادى كان ظروفهم الحمدلله احسن ان بعد مالجمعية قدرت تنقل نشاط جمع القمامة بره المنطقة اتبنت مدرسة ابتدائى جوه المنطقة وديت ابنى فيها ومابقتش خايفة عليه من الطريق والخروج بره المنطقة , كمان المنطقة كلها اتنبت بيوت وعمارات وبقى لينا انا وعيلتى بيت حلو بعد ماكان بيتنا صفيح زمان . ونشكر ربنا علي كل شيئ واشكر الجمعية وكل حد وقف جنبي لحد ماكملت تعليمى وبنيت شخصيتى .